Постапката за менување на Уставот денес влегува во втората фаза

Денес Собраниската комисија за уставни прашања ќе ја почне расправата за четирите нацрт-амандмани на Уставот, која ќе трае во следните 12 дена. Пленарната седница претседателот на Собранието, Талат Џафери, ја закажа за 1 декември.
Со утврдувањето на нацрт-амандманите почнува втората фаза од постапката за уставни измени. Нацрт-амандманите се утврдуваат со просто мнозинство од 61 глас, а за последната фаза за усвојување на амандманите ќе биде потребно двотретинско мнозинство или поддршка од 80 пратеници.
Првиот амандман се однесува на замената на зборот Република Македонија со Република Северна Македонија, согласно со Преспанскиот договор. Вториот амандман е во однос на Преамбулата на Уставот, каде одлуките на АСНОМ се заменуваат со Прогласот од Првото заседание на АСНОМ и се додава Охридскиот рамковен договор, со цел да стане конститутивен елемент на државата. Во третиот амандман се додава дека земјата ги почитува суверенитетот, територијалниот интегритет и политичката независност на соседните држави. Со четвртиот амандман се укажува на тоа дека државата ги штити правата и интересите на своите државјани кои живеат или престојуваат во странство, и ги унапредува нивните врски со татковината.

Пронајдете не на следниве мрежи:©ПУЛС24.МК Вестите на интернет страницата на редакцијата ПУЛС24.МК може да се користат исклучиво за лично информирање. Без писмена дозвола од ПУЛС24.МК или посебен договор, не е дозволено преземање, користење или реемитување на вестите.