Доцна синоќа, Трајко Славески беше назначен за нов гувернер на Народната банка. Во Собранието, 68 пратеници гласаа „за“, а 16 беа против. Во рамките на општата дебата и низата реплики и контрареплики, пратениците изразија различни ставови, при што пратениците од владејачкото мнозинство се фокусираа на неговата стручност и компетентност, додека оние од опозицијата се фокусираа на политичката припадност и визијата на Славески за независноста на институцијата.Според биографијата презентирана во предлогот на претседателката Гордана Силјановска Давкова, Трајко Славески е роден во Охрид во 1960 година. Тој е редовен професор на Економскиот факултет при Универзитетот „Свети Кирил и Методиј“ во Скопјe. Студирал на истиот универзитет и завршил постдипломски студии во САД (Калифорниски државен универзитет 1986/87 и Харвардски универзитет 1989/90). Во 1997 година, поминал шест месеци на Државниот универзитет во Аризона во Темпе, Аризона, САД, како гостин-професор.Славески е коавтор на првата Антиинфлаторна програма, важен документ за време на монетарното осамостојување на Република Македонија во април 1992 година во борбата против тогашната хиперинфлација и воведувањето на националната валута – денарот.Во минатото, Славески ги извршуваше функциите министер за развој (1999-2000) и министер за финансии (2006-2009) во Владата на Република Македонија. За време на неговиот мандат како министер за финансии во Владата на Република Македонија, тој ги извршуваше функциите гувернер во Светската банка и гувернер во Европската банка за обнова и развој.
Славески е назначен за нов гувернер на Народната банка на Македонија
