Македонската филхармонија одржа концерт во Златната сала на прочуениот „Музикферајн“ во Виена, еден од најпознатите и најценети концертни простори во светот. Салата беше исполнета до последното место, а публиката ги награди музичарите со стоечки аплауз и ги врати на бис.
Концертот, на кој покрај многубројните гости присуствуваше и државниот секретар во Министерството за култура и туризам Марија С. Ѓоргова, претставува значаен културен момент и заокружување на прославата на 80-годишнината од основањето на Македонската филхармонија, како и одбележување на 30 години од воспоставувањето на дипломатски односи меѓу Република Австрија и Република Македонија.
