Илегалните рудари во Јужна Африка се во тешка состојба откако локалните жители се собраа за да ги претепаат и да ги уништат нивните кампови како одмазда за групното силување на осум млади жени кои снимаа музичко видео во близина на рудник минатата недела. Девојките биле силувани од 80 нелегални рудари.
Рударските кампови беа запалени, а патиштата околу градовите Мансивил и Бекерсдал надвор од градот Кругерсдорп, западно од Јоханесбург, беа забарикадирани со камења и запалени гуми додека жителите протестираа против присуството на нелегални рудари.
Многу од рударите се мигранти од други африкански земји, а реакцијата ја зголеми загриженоста за ксенофобијата. Јужноафриканскиот претседател Сирил Рамафоса го осуди насилството во петокот.
Околу 80 мажи, главно нелегални рудари, беа уапсени минатата недела, откако осум жени беа силувани од повеќе од 10 мажи на 28 јули за време на снимањето на музичко видео на депонија во рудникот во градот Вест Вилиџ. Полицијата соопшти дека го истражува случајот.
Разгневени од силувањето, локалните жители запалиле илегални рударски кампови во соседниот град Кагисо и ги нападнале рударите, кои ги соблекле голи и ги претепале пред да ги предадат на полицијата.
„Мораме да правиме разлика помеѓу легитимниот протест и криминалот, да ги разбереме грижите и поплаките на заедницата, притоа да спречиме загуба на животи и имот“, рече Рамафоса.
„Сите можеме да го разбереме јавното негодување во Кагис предизвикано од групното силување на осум млади жени минатата недела и сите длабоко и искрено ја споделуваме болката на жртвите, нивните семејства и соседните заедници“, додаде тој.
Копананг Африка, група против ксенофобија во Јужна Африка, предупреди дека неодамнешните настани во Кругерсдорп опасно го поттикнуваат антимигрантското расположение.
„За жал, бидејќи некои од илегалните рудари се мигранти без документи, тоа создаде елемент на ксенофобична политика каде луѓето велат дека сите илегални имигранти мора да заминат и сите странци мора да ја напуштат земјата“, рече портпаролот на Копананг Африка, Дејл Мекинли.
Истражувачот и аналитичар Зијанда Стурман изјави за Асошиетед прес дека фрустрацијата на заедницата од работата на полицијата и нивните животни услови придонеле за нивниот гнев.
Јужна Африка страда од зголемено ниво на сиромаштија, невработеност од 35 проценти, криза со електрична енергија, стагнација на економски раст и трета највисока стапка на криминал во светот.
„Луѓето живеат во неверојатно тешки економски услови и се чувствуваат очајно несигурно, а вакво прашање ги покажува оние емоции кои постојат долго време“, рече Стурман.
Таа ја спореди ситуацијата со социјалните немири во Јужна Африка во јули минатата година, каде што беа убиени повеќе од 400 луѓе во провинциите КваЗулу-Натал и Гаутенг.
Јужноафриканскиот национален полициски комесар и други високи владини функционери се очекува да одржат големи состаноци на заедницата во Кагис и Кругерсдорп за време на викендот за да разговараат за нелегалното рударство и криминалот во областа.
Зама Замас, како што се познати илегалните рудари, нелегално влегуваат во стари затворени рудници каде копаат по злато и други благородни метали.
Многумина умираат кога се рушат тунели кои долго време не биле користени, а други кои пронашле злато честопати ги убиваат љубоморни ривали.
Жител на Кругерсдорп, кој сакаше да остане анонимен, изјави за News24 дека веста за сексуално насилство минатата недела не е изненадување.
Зама замасите „долго време ги тероризираат жителите, а ноќе слушаме пукотници. Тоа не е нешто ново. Тоа е стар и постојан проблем што не плаши сите. Жените порано биле силувани и влечени во грмушка. Зама замас е стар проблем, но сега сме на место каде што е деструктивно и опасно“, рече таа.
Јужна Африка има трета највисока стапка на криминал во светот, со „исклучително високи стапки на напади, силувања, убиства и други насилни злосторства“, според WPR (World Population Review).
Една од тинејџерките, која била меѓу осумте манекенки кои биле групно силувани од вооружена банда илегални рудари, го опишала ужасниот напад и раскажала како мажите и ја одзеле невиноста на неа и на нејзината сестра.
Пронајдете не на следниве мрежи:
