Лиланд е млад средношколец. Живее со разведени родители, во некое мало гратче, сместено некаде во внатрешноста на САД. Забележува дека луѓето околу него се тажни, безнадежно тажни, осамени или лоши. Нивната тага само ја зголемува неговата тага, макар што повеќето од нив не поседуваат свест за сопствената тага. Особено го растажува судбината на хендикепираното момче, кое сиот свој живот ќе мора да го помине во таа состојба – згрижен од своите, осамен и незабележан од другите или предмет кој предизвикува потсмев кај бесчувствителните. Неможејќи да ја поднесе неговата трајна тага, одлучува да го убие, како единствен начин тагата да згасне. Не убива од страст, од омраза или од љубов. Убива од неможноста да ја поднесе тагата – како својата, така и туѓата.