Гувернерот на државата Вашингтон, Боб Фергусон, предупреди дека 100.000 луѓе ќе мора да се евакуираат поради силни поплави. Војниците на Националната гарда одат од врата до врата од раните утрински часови по локално време за да ги евакуираат жителите на населбите северно од Сиетл.

Силни поплави го погодија западниот дел на државата Вашингтон. Водата однесе многу мостови и откорна куќи од нивните темели, а многу семејства се засолнија на своите покриви, објави АП. Службениците предупредија дека насипите и браните би можеле да се урнат и им наредија на десетици илјади жители во долината на реката Скагит веднаш да ги напуштат своите домови. Наредбата се однесува на целиот град Бурлингтон, во кој живеат речиси 10.000 луѓе. Неколку реки во областа ги надминаа нивоата на поплави преку ноќ.