Повеќе од илјада летови беа откажани во Америка трет ден по ред бидејќи авиокомпаниите се обидуваа да се опорават од глобалниот прекин на ИТ што остави илјадници патници заглавени на аеродромите.

Според FlightAware, повеќе од 1.200 летови до, од или во Америка се откажани до денес, а повеќе од 4.000 се одложени, објави CNN.

Повеќе од 600 откажани летови беа поврзани со „Делта ерлајнс“, која нудеше ваучери и други поволности за некои од засегнатите клиенти. Вчера во Америка беа откажани 2.136 летови, а повеќе од 21.300 беа одложени, објави веб-страницата (Flight Aware).

Технички проблеми ги погодија не само аеродромите, туку и бизнисите, банките, владините агенции, здравствените установи, училиштата ширум светот откако ИТ комуникациите беа прекинати поради неисправно ажурирање на софтверот за оперативните системи Мајкрософт Виндоус произведени од фирмата за сајбер безбедност CrowdStrike.

Извршниот директор на таа компанија Џорџ Курц им се извини на клиентите и рече дека санацијата е завршена, но експертите велат дека враќањето на системот во нормала ќе биде долгорочен процес. Најголемите авиокомпании најавија дека нивните активности се нормализираат, но дека може да има повеќе доцнења и прекини во сообраќајот.