Барон Трамп, синот на американскиот претседател Доналд Трамп, наводно минатата година ѝ спасил живот на млада жена откако преку ФејсТајм бил сведок на нејзино злоставување во Лондон. Откако видел што се случува на видеоповикот, Барон веднаш го повикал британскиот број за итни повици – 999, известуваат светските медиуми.
Според наводите изнесени од обвинителството пред судот, инцидентот се случил кога рускиот државјанин Матвеј Румјанцев (22) станал љубоморен на пријателството меѓу жртвата и синот на Трамп. Како што пренесува „Дејли мејл“, Румјанцев побеснел откако Барон се обидел да ја добие девојката порано таа вечер.
Кога Румјанцев конечно одговорил на видеоповикот, ја насочил камерата кон лицето на девојката, ја повлекол за коса, ја фрлил на под и ѝ викал: „Ти не вредиш ништо“, било наведено пред судот.
На судењето била пуштена и снимка од повикот што Барон го упатил до британската итна служба. Трамп помладиот, кој имал потешкотии да го пронајде точниот број за итни случаи во Велика Британија, на операторот му рекол: „Тукушто ме повика девојка. Ја тепаат. Ова е навистина итен случај, ве молам.“
Операторот потоа го прекорил бидејќи не одговарал директно на прашањата: „Можете ли да престанете да бидете непристојни и навистина да одговарате на моите прашања? Ако сакате да ѝ помогнете на таа личност, одговарајте јасно и прецизно“.
На прашањето како ја познава жртвата, Барон одговорил: „Ја запознав преку социјалните мрежи. Навистина ја тепаат, а повикот беше пред околу осум минути, не знам што можело да се случи досега.“ Потоа додал: „Се извинувам ако звучев непристојно“.
Полицијата набргу пристигнала на адресата. Снимките од телесните камери на полицајците ја прикажуваат жртвата како им вели: „Јас сум пријателка со Барон Трамп, синот на Доналд Трамп.“ Еден од полицајците тогаш прокоментирал: „Значи, изгледа дека овој дојавувач од Америка е веројатно синот на Доналд Трамп.“
Жртвата на судењето изјавила дека токму повикот на Барон ѝ го спасил животот.
„Барон Трамп ми го спаси животот. Тој повик беше како знак од Бога во тој момент“, рекла таа.
Румјанцев, поранешен ММА борач, е обвинет за силување, физички напад, нанесување телесни повреди и попречување на правдата. Тој ги негира сите обвиненија, а одбраната тврди дека исказите на жртвата се измислени.
Судењето е во тек.
