Генетиката одредува до 55 проценти од животниот век на една личност, според истражување објавено денес во научното списание „Science“ , во кое исто така се наведува дека гените играат многу поголема улога во животниот век отколку што се сметаше претходно.
Меѓународен тим истражувачи користел податоци од студии на близнаци за да ги разликува надворешните причини за смрт (несреќи, убиства, инфекции) од внатрешните, биолошки фактори (генетски мутации, болести поврзани со возраста), според NBC News . Со одвојување на овие категории, тие добиле попрецизна проценка за влијанието на генетиката врз очекуваниот животен век, што е значително повисоко од претходните проценки од 6 до 33 проценти.
– Ова не е резултат на случајност. Ако ги погледнете студиите на близнаци за речиси сè, приближно 50 проценти од особините се наследени. Истото важи и за возрасната граница на менопаузата – рече главниот автор на студијата Бен Сенхар од Институтот Вајцман во Израел.
Професорот Мортен Шајбје-Кнудсен од Универзитетот во Копенхаген истакна дека новиот пристап „го елиминира надворешниот шум“ и ја открива основната биологија на стареењето. Тој потсети дека гените значително го одредуваат животниот век на различните видови, од квасецот што живее 13 дена до китовите што можат да живеат повеќе од 200 години.
Сепак, експертите предупредуваат дека здравиот начин на живот сè уште игра клучна улога.
– Ако генетиката одредува 55 проценти од животниот век, преостанатите 45 проценти сè уште зависат од исхраната, вежбањето и навиките – рече Сенхар.
Студијата, исто така, укажува на важноста од понатамошно истражување на заштитните гени што го „продолжуваат животот“, особено кај луѓе кои носат заштитни гени против хронични болести, како што се FOXO3, APOE и SIRT6. Заклучокот на истражувачите е дека долговечноста веројатно зависи од интеракцијата на неколку гени, а не од еден клучен „ген за сè“.
The post Генетиката одредува до 55 проценти од животниот век: Научниците го утврдија ова следејќи близнаци appeared first on Во Центар.
