Поранешната претседателка на Антикоруциската комисија Татјана Димитровска денеска во судница се изјасни дека не е виновна за делата за кои се сомничи. Димитровска е обвинета дека како претседателката на Антокорупциската комисија му оддала службена тајна на директорот на ТЕЦ Неготино Небојша Стојановиќ, обвинет во случајот „Адитив“. Покрај ова Димитровска се сомничи и дека на ревизорот Миле Столевски му ги дала логовите за да полага во нејзино име за сертификат за класифицирани информации.
– Ја разбирам содржината на обвинението и не ги признавам делата. Не се чувствувам виновна и мислам дека не сум сторила ништо за што сум обвинета, рече Димитровска.
Таа даде оставка од функцијата откако Обвинителството поднесе обвинение против неа за оддавање службена тајна.
Според обвинението, Димитровска, му давала на Стојановиќ доверливи податоци за поведени постапки, отворање предмети против правни и физички лица, службени белешки, како и информации за проверка на имотната состојба на обвинетиот и неговото семејство.
