Уран и Нептун се две планети кои историски се класифицирани како „ледени џинови“ и орбитираат далеку на студените рабови на нашиот Сончев систем. Сепак, можно е нашето разбирање за нивниот состав да е сосема погрешно и овие планети всушност да се полни со карпи, сугерираат истражувачите во нова студија.
„Откривме дека и Уран и Нептун имаат надворешни слоеви кои се составени претежно од карпи, како и од водород и хелиум. Ова е во спротивност со вообичаеното верување дека тие се ледени планети“, изјави за Space.com авторката на студијата Јамила Мигел од Холандскиот институт за вселенски истражувања.
Овие две планети имаат карпести внатрешни јадра опкружени со ледени мантии, а потоа и густи атмосфери за кои се смета дека содржат водород, хелиум и метан, како и силикатни облаци. Во некои области со висок притисок, гасовитата атмосфера преминува во течна состојба, но резултатите од ова истражување сугерираат дека овие атмосфери може да бидат „расфрлани“ и со карпи.
Истражувачкиот тим дошол до овие заклучоци откако ново истражување покажало дека објектите во транс-нептунскиот регион, ледениот регион зад Нептун, се всушност повеќе карпести отколку ледени. Претходните студии веќе сугерираа дека објекти како Плутон, кометите и телата од Кајперовиот појас имаат покарпест состав, велат истражувачите.
„Мислевме дека ако овие објекти се претежно карпести, можеби Уран и Нептун се такви“, рече Мигел.
За да дојдат до своите заклучоци, истражувачите го моделирале составот на обете планети, симулирајќи ги нивните обвивки (внатрешна и надворешна атмосфера), мантија и јадро. Врз основа на услови како што е температурата во атмосферските слоеви, тимот открил дека овие услови би можеле да доведат до кондензација на силикатни облаци во одредени делови од атмосферата, создавајќи карпест материјал.
Значи, иако Уран и Нептун се познати како ледени џинови што лежат далеку од Сонцето, тие се „покарпести“ отколку што претходно се сметаше за „ледени“ планети. Како што вели Мигел, „тие можеби имаат многу мраз во нивната внатрешност, но сигурно не се целосно ледени како што претходно верувавме“.
Мигел верува дека овие нови откритија би можеле да ја отворат и дебатата за рекласификација на овие планети.
„Треба да ја промениме нивната класификација за да не биде заблудувачка. Наместо „ледени“ или „карпести“, би можеле едноставно да ги наречеме „мали џинови“ или нешто слично“, истакна таа.
Сепак, важно е да се нагласи дека оваа студија не претставува конечна нова класификација на овие планети, но отвора интересни прашања за нивниот состав, меѓу кои се: дали нивните атмосфери навистина можат да бидат полни со карпи, кои други важни аспекти од нивниот состав сè уште не се откриени, кои други мистерии се кријат во студените, далечни делови од нашето космичко соседство…
The post Уран и Нептун би можеле да бидат полни со камења appeared first on Во Центар.
