„Време е да создадеме општество во кое жените нема да треба постојано да вложуваат натчовечки напори за да го реализираат својот потенцијал“, порачува меѓу другото претседателот Стево Пендаровски во пораката по повод Меѓународниот ден на жените.

„Денеска кога ја одбележуваме децениската борба за социјална, економска и политичка еднаквост на жените, да се потсетиме дека секоја жена има право на слободен избор за своето тело, семејство, образование, занимање, работа, кариера, развој, политичко дејствување и учество во јавниот живот“, се наведува во честитката.

Според него, ниту едно општество не може да се развие доколку половина од населението е исклучено од тој развој.

„Мораме да се застапуваме за поголемо политичко учество на жените, поголем број на жени на раководни позиции, да носиме политики во кои ќе ги планираме потребите на жените, буџети кои ќе ја имаат родовата димензија. Да создаваме општествен амбиент што ќе овозможи повеќе жени да бидат вклучени, а не исклучени. Доколку сакаме да изградиме модерно, отворено и демократско општество потребно е да направиме повеќе за еднаквите можности на жените и мажите, а нерамноправноста, дискриминацијата и шовинизмот да ги оставиме во минатото. Жртвите на родово-базирано насилство мора да добијат правда. Треба гласно и одлучно, и стратешки и тактички, да се бориме против родово-базираното насилство, за кое мора секогаш да има праведна разрешница. Борбата за еднаквост не смее да запре“, стои во честитката од претседателот Пендаровски.