Владата соопшти дека интервентно ќе обезбедува по 50.000 литри бесплатна вода за пиење дневно за граѓаните на Гостивар, почнувајќи од денес и во наредните неколку дена, поради состојбата со водоснабдувањето во градот.
Како што информираат од Владата, од првиот момент се во постојана координација со сите надлежни институции и внимателно го следат развојот на настаните.
„Покрај институционалниот одговор, постапувањето на надлежните органи и спроведувањето на сите неопходни контроли и анализи, Владата донесе одлука интервентно да обезбеди од денес и во наредните неколку дена по 50.000 литри бесплатна вода дневно за пиење за граѓаните на Гостивар, со цел да се обезбедат основните потреби на населението додека траат мерките и препораките на надлежните институции“, се наведува во соопштението.
Дистрибуцијата на водата ќе се врши преку Службата за општи и заеднички работи на Владата, на седум пунктови во Гостивар:
Водостопанство – Гостивар, ул. ЈНА бр. 139
Градинка „Пролет“,
ул. Беличица бр. 47
СЕОУ – Гостивар (Средно економско училиште),
ул. Живко Брајковски бр. 39
ЈП Национални шуми – Подружница „Шар“ Гостивар,
ул. Браќа Ѓиноски бр. 165
АД ЕСМ – Подружница кај гаражите (питарница),
ул. Илинденска
Општа болница „Ферид Мурад“ – паркинг,
ул. Чеде Филиповски бр. 29
Територијална противпожарна единица – Гостивар,
ул. Беличица бр. 35
Од Владата додаваат дека надлежните институции продолжуваат со интензивни контроли, анализи и истражни дејствија за утврдување на причините за настанатата состојба.
„Очекуваме целосно расчистување на случајот, а секој што ќе има утврдена одговорност ќе сноси одговорност согласно закон“, наведуваат од Владата.
Воедно, апелираат граѓаните да ги почитуваат препораките на надлежните институции и информациите да ги следат исклучиво преку официјалните канали, додека состојбата целосно не се нормализира.
