Русија ќе донесе нов закон кој ќе овозможи нова мобилизација за војната во Украина.
- Амандманите се напишани за големата војна и општа мобилизација. А таа голема војна веќе се намирисува – изјави шефот на комисијата за одбрана на Думата, Андреј Картаполов, додека рускиот парламент брзаше да го усвои новиот закон.
Законот кој му дозволува на Кремљ да испрати уште стотици илјади луѓе да се борат, открива дека рускиот лидер Владимир Путин, далеку од тоа да бара излез од војната во Украина, се подготвува за уште поголема, пишува Фајненшл тајмс.
Разбирливо е што многумина во Украина и на Запад сакаат да веруваат дека рускиот претседател е во ќош. Украинската војска постепено освојува делови од земјата окупирани од Русите и се покажа способна длабоко да навлезе во непријателска територија – дури и до самиот Кремљ. Расте притисокот од санкциите врз Русија.
Засега, Западот останува обединет во поддршката на Киев, протокот на модерно оружје и пари ги поддржуваат воените напори на Украина, а бунтот организиран од водачот на Вагнер, Евгениј Пригожин и видливите внатрешни борби меѓу руските воени команданти ги зголемуваат надежите дека воената машина на Кремљ ќе се распадне.
КРЕМЛИН ВЕРУВА ДЕКА МОЖЕ ДА ИЗДРЖИ ДОЛГА ВОЈНА
Работите веројатно изгледаат многу поинаку за Кремљ, кој верува дека може да си дозволи долга војна. Се предвидува дека руската економија ќе забележи скромен раст во 2023 година, најмногу благодарение на воените фабрики кои работат деноноќно. Критичните компоненти како што се микрочиповите потребни на одбранбената индустрија доаѓаат од Кина и други извори.
И покрај санкциите, воените ковчези на Кремљ сè уште се преполни со готовина благодарение на неочекуваните енергетски профити минатата година и приспособливоста на руските извозници на стоки кои најдоа нови купувачи и ги подмируваат плаќањата главно во јуани. Руската централна банка би можела дополнително да ја девалвира рубљата, што ќе го олесни плаќањето на војниците и работниците во одбранбената индустрија и внатрешните безбедносни сили.
Исто така, се чини дека Кремљ се уште не е вознемирен од украинската контраофанзива. Кремљ би можел да отфрли каков било напредок на Киев како привремен.
НА ШТО СМЕТА ПУТИН?
Путин смета на фактот дека бројот на луѓе кои потенцијално можат да се мобилизираат е три до четири пати поголем од украинското население. Единствената задача е да ги вооружите и обучите, а потоа да ги испратите во битка. Токму тоа е целта на новиот закон, кој треба да му помогне на Кремљ да избегне уште една официјална мобилизација.
Во иднина, владата може тивко да испраќа покани за регрутирање на онолку луѓе колку што смета дека е потребно. Горната старосна граница за задолжителен воен рок се зголемува од 27 на 30 години, но во иднина може дополнително да се зголеми.
Границите на Русија ќе бидат затворени веднаш откако ќе биде издадено известување за електронска мобилизација за да се спречи масовен егзодус на работоспособни мажи. Заострени се и казните за одбивање на воената служба.
Сето ова, во комбинација со огромната државна инвестиција во проширувањето на производството на оружје, треба да му помогне на Путин да изгради поголема и подобро опремена армија.
ПАРАЛЕЛНА ТАКТИКА
Паралелна тактика е задушувањето на украинската економија. Кремљ сака да го лиши Киев од сите извори на приход, знаејќи дека Украина зависи од средствата обезбедени од нејзините западни сојузници.
Затоа, Москва не само што се повлече од договорот за жито што го дозволи извозот на земјоделски производи на Краина преку Црното Море, туку и започна масовни воздушни напади врз украинските пристаништа за да ја уништи секоја можност за обновување на договорот.
Кремљ се надева дека брзата обнова на руската војска и постепеното уништување на економијата и вооружените сили на Украина ќе резултира со растечка фрустрација на Западот и намалување на материјалната поддршка за Киев.
Пронајдете не на следниве мрежи:
