Археолозите открија зграда од вториот век со мозаици и фрески во близина на Колосеумот во Рим, која можеби служела како касарна за пожарникари во антички Рим, објави денес градската археолошка служба.
Пет од осумте соби на зградата се целосно истражени во паркот на Вила Челимонатана, поранешна благородничка резиденција од 16 век, сместена на ридот Целиум, еден од седумте рида на антички Рим, објавува Ројтерс.
Археолозите пронајдоа мозаик на кој се прикажани делфини, риби, јастози и ракови околу голем двоен сад, како и остатоци од насликан таван украсен со големи црвени и сини кругови.
Мозаичниот дизајн е многу сличен на оној претходно пронајден во касарна на римски пожарникари во Остија, античко римско пристаниште на околу 30 километри од главниот град, соопшти археолошката служба.
Ова укажува дека откриената зграда можеби припаѓала на блиската касарна на Петтата кохорта на бдението, единица на римските пожарникари , според соопштението.
„Доколку оваа претпоставка се потврди, откритието би можело да придонесе за ново разбирање на обемот на еден од најважните воени комплекси на империјалниот Рим“, соопшти службата.
За време на Римското Царство, Вигилите биле задолжени за гаснење пожари и одржување на јавниот ред во текот на ноќта.
Нивната касарна, која се наоѓала веднаш до откриената градба во Вила Челимонатана, користела вода од блискиот аквадукт.
Сепак, постои уште една можност, дека археолозите откриле патрициска резиденција, т.е. домус, од кој повеќе се пронајдени на ридот Целиум.
Присуството на раскошни декорации би ја поткрепило таа претпоставка.
„Само детална анализа на материјалот пронајден за време на ископувањето и откриените структури ќе дадат дополнителни информации за новооткриената градба“, соопшти археолошката служба.
Истражувањето беше финансирано од средствата на Европската Унија наменети за економско закрепнување по пандемијата Ковид-19.
The post Неверојатно откритие во близина на Колосеумот: Пронајдена зграда од вториот век appeared first on Во Центар.
