Екипажот на „Артемис II“ од четири члена, Рид Вајзман, Виктор Гловер, Кристина Кох и Џереми Хансен, денес на првата прес-конференција по нивниот историски лет околу Месечината и назад изјавија дека доживеале моќни емотивни моменти.
Како и фактот дека морале да се прилагодат на животот во ограничен простор, а зборувале и за влијанието на престојот во микрогравитација врз нивната психолошка и физичка состојба.
Командантот на мисијата „Артемис II“, Рид Вајзман, изјави дека членовите на екипажот се засекогаш поврзани и дека ја напуштиле мисијата како најдобри пријатели, со благодарност до сите што учествувале во нејзината реализација, пренесува „Скај њуз“.
Астронаутката Кристина Кох истакна дека треба да се прослави фактот што вселенската агенција НАСА е посветена на вклучување на сите луѓе во истражувањето на вселената, нагласувајќи дека „секој што има сон треба да има еднаква шанса да го оствари“.
Кох изрази верување дека идната мисија „Артемис“ ќе слета на Месечината.
Таа изјави дека мисијата ја научила дека целите можат да се постигнат со напорна работа.
Виктор Гловер рече дека оваа мисија била кратка во споредба со, на пример, долг престој на Меѓународната вселенска станица.
Сепак, тој истакна дека е важно процесите да се спроведат до крај, бидејќи на тој начин се учи и се воведуваат промени за идните, подолги мисии.
Единствениот канадски член на екипажот на мисијата „Артемис II“, Џереми Хансен, рече дека му било навистина освежувачки да види колку луѓе ја следеле мисијата.
„Луѓето се навистина одлични… Она што го видов ми донесе поголема радост и поголема надеж за нашата иднина“, истакна тој.
И астронаутите плачат
Членовите на екипажот, исто така, опишаа интензивни моменти за време на враќањето на Земјата, како и емоционални реакции по мисијата, наведувајќи дека многу од нив плачеле додека комуницирале со семејствата од вселената.
Астронаутите, исто така, го истакнаа силното тимско единство за време на мисијата, наведувајќи дека во текот на 10-те дена биле „буквално еден врз друг“ поради ограничениот простор, но дека успешно функционирале како тим.
Вајсман го бранеше вселенскиот тоалет на вселенското летало и покрај повремените технички проблеми за време на мисијата, истакнувајќи дека системот „работел одлично“.
За време на престојот во вселената, екипажот имал повремени проблеми со тоалетот, главно поради блокади во системот за отпадни води, што го отежнувало пуштањето вода во него.
Вајсман додаде дека во текот на првите денови од мисијата, тој го гледал исфрлањето на содржината од резервоарот во вселената, опишувајќи ја сцената како „милијарди ситни честички мраз кои одат во длабокиот вселенски простор“.
Тој ги пофали инженерите кои го развија системот и рече дека „тие треба да бидат горди“.
Добредојде со овации
Виктор Гловер, пилот на историската мисија „Артемис II“ на НАСА, се врати дома во Лиг Сити. По патувањето до Месечината долго повеќе од еден милион километри, тој беше пречекан со овации во неговата населба и испрати емотивни пораки до толпата.
По неговото пристигнување во соседството, соседите го снимиле додека возел во комбе. Низ спуштениот прозорец, тој им мавнал и се насмевнал, а потоа застанал да разговара со нив.
„Некои од нас никогаш порано не се сретнале, и знаете кој е виновен? Ние самите. Па, ајде да го промениме тоа. Да бидеме повеќе вакви. Да бидеме соседи“, рече Гловер.
„Бог ни рече да ги сакаме ближните како себеси“, додаде тој, на што публиката аплаудираше.
„Те сакам“, рече тој на крајот.
@_itslisso I AM SO PROUD. WOW! Welcome home to our neighborhood hero! I can’t believe I witnessed this moment…. Unreal. #artemis #nasa #victorglover #artemisII #foryoupage ♬ All Of The Lights – Kanye West
Историската мисија „Артемис II“
Гловер се врати на Земјата на 10 април заедно со командантот Рид Вајсман и специјалистите за мисии Кристина Кох и Џереми Хансен.
Ова беше првата мисија на НАСА на Месечината со екипаж по повеќе од 50 години. За време на десетдневното патување, екипажот помина повеќе од еден милион километри и стана првиот што ја виде целата друга страна на Месечината во живо.
Мисијата е значајна и затоа што Кох е првата жена, Гловер првиот астронаут со темна кожа, а Хансен првиот неамериканец кој летал околу Месечината.
Пораки од вселената
За време на мисијата, екипажот испраќаше инспиративни пораки секој ден. Во интервју за Велигден, Гловер зборуваше за вселената и заедништвото:
„Во ова огромно пространство има едно прекрасно место – нашата Земја. И сите сме заедно на неа.“
Виктор Гловер (49) е роден во Помона, Калифорнија. Студирал на Калифорнискиот политехнички универзитет во Сан Луис Обиспо, а бил избран за астронаут на НАСА во 2013 година. Пред „Артемис II“, тој бил пилот на мисијата „SpaceX Crew-1“ до Меѓународната вселенска станица.
The post Астронаутите од „Артемис II“ откриваат сè: „Плачевме“; Сите соседи ги пречекаа appeared first on Во Центар.
Пронајдете не на следниве мрежи:
