Австралијката Џенитар Сау На’амоана роди идентични четворки во болница во Квинсленд, по бременост што лекарите ја опишаа како исклучително ретка.
Бебињата се родени во Кралската болница за жени во Бризбејн, а бременоста била природна и настаната од едно оплодено јајце кое се поделило на четири. Специјалистот за мајчино-фетална медицина, д-р Алекса Бендал, изјавила дека станува збор за исклучително необичен случај:
„Сметаме дека веројатно е околу еден на 15 милиони шансите оваа бременост да се зачне спонтано. Не мислиме дека ова некогаш се случило во Австралија.“
Експертите наведуваат дека веројатноста за природно зачнување на четворки е околу 1 на 700.000, додека повеќето вакви бремености се постигнуваат со помош на медицинска технологија. Болницата соопшти дека Наамоана и нејзиниот сопруг Џортам не планирале да имаат ново бебе бидејќи веќе имаат четири деца и дека веста за бременоста ги изненадила.
Бременоста носеше висок ризик од компликации, особено затоа што фетусите делеа една плацента. На’амоана беше под надзор на голем медицински тим од 10-тата недела од бременоста, а беше примена во болница во 25-тата недела за континуирано следење на нејзината состојба. Девојчињата се родени со царски рез на 14 јули.
Бендал рече дека мајката и бебињата се добро. Девојчињата, по име Емили, Хариет, Катерина и Алекса, се наоѓаат на одделот за интензивна нега за новороденчиња, а едно од нив го добило името по докторот како знак на благодарност од семејството.
The post Австралијка роди идентични четворки по екстремно ретка бременост appeared first on Во Центар.
