Белата куќа објави официјална интернет-страница насловена „Lab Leak: The True Origins of COVID-19“, на која администрацијата на американскиот претседател Доналд Трамп ја претставува својата позиција дека пандемијата најверојатно започнала со истекување на вирусот од лабораторијата во Вухан, Кина.

На страницата се наведуваат аргументи во прилог на оваа теорија, меѓу кои се тврдења за истражувањата во Институтот за вирусологија во Вухан, карактеристиките на вирусот SARS-CoV-2 и критики кон начинот на кој американските здравствени власти и претходната администрација ја информирале јавноста за потеклото на вирусот.

Воедно, страницата ги критикува поранешниот директор на Националниот институт за алергии и заразни болести, Ентони Фаучи, политиките за време на пандемијата, како и мерките поврзани со затворањата, задолжителното носење маски и други ограничувања.

Прашањето за потеклото на COVID-19 и натаму останува предмет на расправа. Дел од американските разузнавачки агенции и политички истраги сметаат дека лабораториското истекување е поверојатно сценарио, додека значителен дел од научната заедница и понатаму смета дека не постојат доволно докази за конечен заклучок и дека природното пренесување од животни на луѓе останува можна хипотеза. објави Скопје1.мк