Хрватската фудбалска ѕвезда Лука Модриќ официјално го напушта Реал Мадрид, потврди клубот преку социјалните мрежи, а и самиот Модриќ ја сподели веста преку емотивно писмо на Инстаграм.
Реал Мадрид го одбележа моментот со кратка, но моќна порака:
„Ти благодариме, Лука!“
Модриќ, кој се приклучи на клубот во 2012 година, во сабота ќе го одигра својот последен натпревар на стадионот „Сантијаго Бернабеу“. Во прошталното писмо до навивачите, тој изрази длабока благодарност и гордост што го носел дресот на најтрофејниот клуб во светот.
Се присети на своето доаѓање исполнето со амбиција, на патувањето што му го променило животот, и на трансформацијата што ја доживеал и како играч и како човек. Им се заблагодари на претседателот Флорентино Перез, на соиграчите, тренерите и целото семејство на Реал Мадрид за поддршката.
Потсети на незаборавни пресврти, финалиња, прослави и магични ноќи на „Бернабеу“, но нагласи дека над сите титули, најважна му е љубовта што ја добил од навивачите.
Иако по Светското клупско првенство повеќе нема да биде на теренот како дел од клубот, Модриќ вети дека засекогаш ќе остане верен навивач на Реал Мадрид.
Писмото го заврши со зборовите:
„Да живее Мадрид и ништо друго.“
