Во жешките, летни денови ништо подобро не освежува од лесните чорбички и потажи од зеленчук.
Во сезоната на тиквички направете си крем-чорба од овој зеленчук по рецепт којшто нема да ви одземе многу време.
Состојки:
- 500 грама тиквички;
- 50 грама путер;
- 2 чешниња лук;
- 1 лажица брашно;
- 250 милилитри павлака за готвење;
- свежи зачини;
- сол, бибер;
- семки од сончоглед или тиква (по желба);
- малку лимонов сок.
Подготовка:
Излупете ги тиквичките, па изрендајте ги, малку посолете ги и оставете ги да отстојат 10-на минути.
Во тенџере во кое ќе ја варите чорбата, ставете го путерот, па кога тој ќе се растопи на тивок оган додадете една лажица брашно и кратко пропржете, не менувајќи ја температурата на ринглата.
Кога брашното ќе се пропржи додадете ги тиквичките, па динстувајте.
Кога тиквичките ќе бидат готови, додадете исечкан лук, бибер и павлака за готвење, како и свежи зачини и после неколку минути тргнете го тенџерето од рингла.
Пред да послужите додадете малку лимонов сок и семки од сончоглед, односно тиква.
На здравје!
