Истрагата на американските власти идентификуваше 158 римокатолички свештеници од надбискупијата Балтимор обвинети за сексуално и физичко малтретирање на повеќе од 600 жртви во изминатите 80 години.
Јавниот обвинител на Мериленд, Брајан Фрош, денеска објави дека неговата канцеларија го завршила извештајот од 463 страници за истрагата што започна во 2019 година и побара од судот да ја објави.
„Жртвите со децении пријавуваа сексуална злоупотреба од католички свештеници, а Црквата со децении го прикриваше злоставувањето, наместо да бара одговорност од злоставувачите и да ги штити своите собранија“, напиша Фрош во поднесокот на судот.
Извештајот „Злоупотреба на свештенството во Мериленд“ идентификува 115 свештеници кои биле кривично гонети за сексуална злоупотреба и/или биле јавно идентификувани од страна на надбискупијата како „веродостојно обвинети“ за сексуална злоупотреба.
Во документот се спомнуваат уште 43 свештеници обвинети за сексуална злоупотреба, но надбискупијата јавно не ги идентификувала, се вели во судската пријава.
Во судската пријава се наведува дека се идентификувани повеќе од 600 жртви, но се додава дека „речиси сигурно има уште стотици, бидејќи годишниот извештај на Министерството за правда покажува дека повеќето случаи на сексуален напад не се пријавени“.
Злоупотребуваните лица вклучуваат и момчиња и девојчиња, од предучилишна возраст до тинејџери.
Пронајдете не на следниве мрежи:
