Една бизарна куќа со пет спални соби и околу 147 штекери се продава за 1,3 милиони фунти. Огласот со фотографиите во британскиот Мидлсекс ги збунил корисниците на интернетот, особено кога ја виделе просторијата во која има точно 36 штекери.
Домот во огласот е опишан како “семејна куќа со светол и простран влез”, а авторот на огласот избегнал да напише нешто повеќе за штекерите кои се наоѓаат насекаде по ѕидовите.
Куќата го воодушевила и сценаристот Тоби Дејвис кој го споделил огласот на Твитер.
“Размислувам за купување на оваа куќа, ама не сум сигурен дали има доволно штекери”, се пошегувал Дејвис.
Други во коментари се обидувале да погодат која е причината која го навела сопственикот да постави толку штекери низ целиот дом.
“Куќата изгледа како да има сипаници”, напишал еден корисник, а други се сомневаат дека на тоа место се одгледувал канабис, па сопствениците инсталирале голем број штекери за различни облици на греење.
Дел од корисниците на социјалните мрежи забележале дека штекерите недостасуваат во бањата и кујната каде што обично се најпотребни.
